Мансабдорларни миллий ҳаво ташувчиларида учишга мажбур этувчи қоида маҳаллий авиакомпанияларни қўллаб-қувватлашга қаратилган. Бу ҳақда Россия президентининг матбуот котиби Дмитрий Песков маълум қилди, дея хабар бермоқда «РБК».
«Бу кўп давлатларда қўлланадиган амалиёт, — дея изоҳ берган Песков. —Агар хизмат сафарлари бюджет ҳисобидан амалга оширилаётган бўлса, давлат ўз хизматчиларини миллий ташувчи хизматидан фойдаланишга мажбур этади. Мабодо парвоз бюджет ҳисобидан бўлмаса, қайси авиакомпания самолётида учишининг аҳамияти йўқ».
Мансабдорларга хориж авиакомпаниялари рейсларига давлат ҳисобидан билет харид қилиш маҳаллий самолётлар хизмат сафари бажариладиган манзилга учмаса ёки сафар муддатлари чоғида билет қолмаган бўлса рухсат берилади.
Эслатиб ўтамиз, Россия президенти Владимир Путин 30 сентябрь куни мансабдорларга хизмат сафарлари учун чет эл компаниялари рейсларига билет олишни тақиқловчи фармон чиқарди. Бу қоидадан фақат Евросиё иқтисодий иттифоқига кирувчи мамлакатлар ташувчилари учунгина истисно қилинган.
Изоҳ (0)