13 октябрь куни 29 ёшли хакер Сергей Вовненкога АҚШнинг Ньюарк шаҳри судида банк маълумотларини олиб сотиш, банк ҳисобларини ўғирлаш ва 13 мингдан ортиқ бузиб кирилган тизимлардан ботнет яратиш айбловлари қўйилди, дея хабар бермоқда TJournal.
Fly, Flycracker ва MUXACC1 тахаллуслари остида фаолият олиб борган Вовненко журналистларга, шунингдек, хавфсизлик бўйича мутахассис Брайан Кребсни наркотиклар ёрдамида чалишга уриниш билан боғлиқ воқеанинг бош қаҳрамони сифатида ҳам таниш.
Кребс Вовненко билан биринчи марта 2013 йилда тўқнаш келган бўлиб, ўшанда у Twitter’да Кребсни шубҳали линкни босишга ундаб, унинг жиғига тега бошлади. Fly ўз блогида Кребснинг кредит ҳисоботлари нусхалари, у яшайдиган жой харитаси ва унинг уйи эшигининг суратини жойлади.
Кребс суриштириб, Вовненко молиявий фирибгарлик масалаларига бағишланган форумда администратор бўлганини аниқлади ва махфийлик билан форумга кириб, украиналик интернет қора бозоридан героин сотиб олиш учун маблағ йиғаётганига гувоҳ бўлди.
Зарур маблағни йиғиб, Вовненко героинни Кребсга жўнатди ва полицияни чақирди, бироқ Кребс полицияни жўнатма ҳақида олдиндан огоҳлантириб қўйганди. Ҳодисадан Вовненко ғазабланди ва навбатдаги мактубида Кребснинг рафиқасига таҳдид қилди.
Шундан сўнг Кребс Fly’нинг шахсиятини аниқлашга қаттиқ киришди ва буни уддалади ҳам. Хавфсизлик эксперти Вовненко билан энди юзма-юз учрашиш ниятида.
Хакерга қўйилган барча айбловлар тасдиқланса, у 30 йилгача қамоқ жазоси ва миллион доллар миқдорида жаримага ҳукм қилиниши мумкин. Ҳукм 19 октябрда чиқарилиши кутилмоқда.
Изоҳ (0)