Атом энергетикаси бўйича халқаро агентлик (МАГАТЭ)нинг ядро хавфсизлиги масалалари бўйича директори Хамбар Мрабит сентябрь ойи охирида хизмат сафари билан Ўзбекистонга ташриф буюрди. Бу ҳақда 14 октябрь куни Ўзбекистон Фавқулодда вазиятлар вазирлиги матбуот хизмати хабар берди.
Ташриф дастурига мувофиқ, 28 сентябрь куни Ўзбекистон Соғлиқни сақлаш вазирлиги Врачлар малакасини ошириш институтида Фавқулодда вазиятлар вазирлиги, Соғлиқни сақлаш вазирлиги, «Саноатгеоконтехназорат» давлат инспекцияси, Давлат божхона қўмитаси мутасадди раҳбарлари ва масъул ходимлари иштирокида учрашув бўлиб ўтди.
Учрашувни «Саноатгеоконтехназорат» давлат инспекцияси ўринбосари А.Юнусов очиб, Ўзбекистонда ядро хавфсизлиги йўналишидаги олиб борилаётган ишлар савияси, Ўзбекистон билан МАГАТЭ ўртасидаги икки томонлама муносабатларнинг ҳозирги босқичи ва ривожи тўғрисида фикр билдирди.
МАГАТЭнинг ядро хавфсизлиги масалалари бўйича директори Хамбар Мрабит ташкилотнинг фаолияти ва ядровий хавфсизликни таъминлаш борасида ҳамкорликда олиб борилаётган ишлар, эришилган ютуқлар тўғрисида гапириб ўтди.
Учрашув якунида МАГАТЭ томонидан беғараз кўмак тариқасида тақдим этилган махсус асбоб-анжомларни Соғлиқни сақлаш вазирлигига ҳамда Давлат божхона қўмитасига тантанали равишда топшириш маросими бўлиб ўтди.
Изоҳ (0)