«Ўзбекистон ҳаво йўллари» Миллий авиакомпанияси Японияда бўлиб ўтган JATA Tourism EXPO Japan-2015 халқаро сайёҳлик кўргазмасида ўз хизматларини намойиш этди. Бу ҳақда UzDaily хабар бермоқда.
Қайд этишларича, «Ўзбекистон ҳаво йўллари»нинг имкониятлари Ўзбекистон учун тақдим этилган ягона миллий стенд доирасида намойиш этилган бўлиб, стендда Ўзбекистоннинг етакчи сайёҳлик компаниялари ва агентликларининг хизматлари ҳам кўрсатиб ўтилганди.
«Халқ амалий санъати буюмлари, сувенир маҳсулотлар билан безатилган Ўзбекистон стендига кўплаб меҳмонларнинг ташриф буюргани Японияда Ўзбекистонга бўлган қизиқиш ўсиб бораётганига ёрқин далилдир», — дейилади хабарда.
Кўргазма доирасида ташкил этилган сайёҳлик форумида, шунингдек, Ўзбекистоннинг Япониядаги элчихонасида бўлиб ўтган туризмни ривожлантириш бўйича семинарларда ҳам «Ўзбекистон ҳаво йўллари»нинг тақдимотлари бўлиб ўтди.
«Ўзбекистон ҳаво йўллари» вакиллари салоҳиятли мижозлар ва чет эллик ҳамкорлар, Япония туристик компаниялари, хорижий реклама ва ахборот агентликлари билан ишчи учрашувлар ўтказди.
UzDaily’нинг қайд этишича, «Ўзбекистон ҳаво йўллари» Токиога бевосита рейсларни амалга ошираётган Марказий Осиёдаги ягона авиаташувчи ҳисобланади.
Изоҳ (0)