Хитойлик аёл дунё рекордини янгилаш учун 2,5 метр узунликда соч ўстирди

Хитойлик Ги Менг Гиннеснинг Рекордлар китобига кириш учун 35 йил давомида сочини 2,52 метрга ўстирди. Бу ҳақда China Daily хабар бермоқда.

Юньнань провинциясилик Мяо элатига мансуб 59 ёшли аёл 24 ёшидан бери сочига қайчи теккизмаган. Улар бир йилда олти—етти сантиметрга ўсган. Менг далада ишлаётганида сочини бошига беш марта ҳалқа қилиб ўриб олиб, белидан уч марта айлантиради.

Аёлнинг айтишича, узун сочлар саломатлик учун фойда эмиш, аммо уларнинг нафи айнан нимада эканлигига аниқлик киритмади. Аксинча, сочини ювганидан сўнг бир ҳафта қуришини кутишидан зорланган.

Олдинроқ хоним дунё рекордини қўйиш нияти бўлгани учун сочини 19 000 юанга (тахминан 3 минг доллар) сотишдан бош тортганди. Айни пайтда мазкур натижа ҳамюрти Кси Куипингга тегишли: 2004 йилда бу аёл 5,6 метр узунликдаги сочи билан Гиннеснинг Рекордлар китобидан ўрин олганди.