2015 йилнинг 5—7 октябрь кунлари Ўзбекистон-Литва вазирликлараро маслаҳатлашувларининг олтинчи раундида иштирок этаётган Ўзбекистон Республикаси делегацияси Вильнюс шаҳрида Литва қишлоқ хўжалиги вазири ўринбосари Вилиус Мартусявичюс, Литва Сеймининг Ўзбекистон билан парламентлараро ҳамкорлик бўйича гуруҳи раиси Валериус Симулик, иқтисодиёт вазири ўринбосари Раса Норейкене ҳамда Литва Шарқий Европа тадқиқотлар маркази ва Геосиёсий тадқиқотлар маркази вакиллари билан учрашув ва музокаралар ўтказди. Бу ҳақда Ўзбекистон Ташқи ишлар вазирлиги расмий сайти хабар бермоқда.
Икки томонлама муносабатларни янада ривожлантириш ҳамда ҳамкорликнинг турли соҳаларида янги қўшма лойиҳалар билан бойитиш бўйича истиқболли таклифлар амалий жиҳатдан муҳокама қилинди.
Литвага ташриф доирасида, делегация ушбу мамлакатнинг етакчи ишбилармон тузилмалари вакиллари иштирок этган Литва бизнес конфедерациясида Ўзбекистоннинг инвестицион салоҳияти тақдимотини ўтказди ҳамда минтақада қуёш энергиясидан фойдаланиш бўйича технология ишлаб чиқарувчи корхоналар ичида етакчи ҳисобланадиган BOD Group ҳамда Болтиқ мамлакатларида энг йирик кимёвий ўғит ишлаб чиқарувчи AB Achema компанияси фаолияти билан танишди.
Изоҳ (0)