Япония полицияси якудзаларнинг мамлакатдаги энг йирик мафия синдикати — «Ямагути-гуми»да парчаланиш юз берганидан сўнг жиноий гуруҳларнинг 29 аъзосини ҳибсга олди, шунингдек, 20 дан ортиқ тинтувлар ўтказди. Бу ҳақда «ТАСС» хабар бермоқда.
«Биз мафия ичидаги жорий низолар ҳақида аниқ маълумотларга эга эмасмиз, бироқ фуқароларнинг хавфсизлигини таъминлаш учун барча чораларни кўришга тайёрмиз», — деди Миллий полиция бошқармаси бошлиғи Масахито Канетака матбуот анжуманида.
Япония полицияси маълумотларига кўра, ҳибсга олинган орасида «Ямагути-гуми» аъзолари ҳам, мазкур синдикатдан алоҳида ажралиб чиққан «Кобе Ямагути-гуми» вакиллари ҳам бор.
Мамлакат ҳуқуқни муҳофаза қилиш идоралари, мафия ичидаги парчаланиш таъсир доираларини қайта тақсимлаш йўлидаги қонли тўқнашувларга сабаб бўлиши билан боғлиқ хавотирлар сабаб, юқори тайёргарлик ҳолатида турибди.
Сентябрь бошида асосий «Ямагути-гуми» синдикатидан 3 минг киши ажралиб чиқиб, алоҳида «Кобе Ямагути-гуми» гуруҳини ташкил этди. Унга бошқа бир синдикат — «Ямакен-гуми» босси, 67 ёшли Кунио Иноуэ раҳбар этиб танланди.
«Ямагути-гуми» 13 та турли мафия синдикатлари ва гуруҳларини ўзида бирлаштирган эди. «Ямакен-гуми» сафида 2 мингга яқин одам бўлиб, улар амалда «Ямагути-гуми»нинг асосини ташкил этарди.
«Ямагути-гуми»да 1980 йили ҳам парчаланиш юз берган. Ўшанда бу ҳолат қарийб 300 та қонли тўқнашувларга сабаб бўлган, кўплаб одамлар қурбон бўлганди. Ўшанда асосий қарама-қаршилик «Ямагути-гуми» жангчилари ва синдикат таркибидаги «Итива-кай» гуруҳи ўртасида юз берган.
Изоҳ (0)