Қозоғистон президенти БМТ штаб-квартирасини Осиёга кўчиришни таклиф қилди. Бу ҳақда Kazakhstan Today хабар бермоқда.
«70 йил аввал Миллатлар лигаси ўрнига Бирлашган Миллатлар ташкилоти тузилаётганда унинг штаб-квартирасини Нью-Йоркда жойлаштиришга қарор қилинганди, — деб изоҳ берди Нурсултон Назарбоев БМТ Бош Ассамблеясининг 70-сессиясидаги чиқиши чоғида.— Бу ўша пайтда дунёнинг ривожланиш маркази Европадан глобал ўсишнинг янги нуқтаси — АҚШга кўчгани билан боғлиқ».
Қозоғистон президентининг айтишича, XXI асрда Ер юзи аҳолисининг учдан икки қисми яшаётган ва улкан ресурслар жамлаган Осиё қитъаси тараққиётнинг янги марказига айланиб бормоқда.
«Бундай тарихий имкониятдан албатта фойдаланиш лозим. БМТ штаб-квартирасини Осиёга кўчириш тўғрисида ўйлаб кўришни таклиф қиламан», — дея таъкидлаган Назарбоев.
Изоҳ (0)