Қозоғистон президенти Нурсултон Назарбоев БМТга аъзо давлатларнинг дунё валютасини ишлаб чиқиш борасидаги уринишларини бирлаштиришга чақирди. Бу ҳақда «РИА Новости» хабар бермоқда.
БМТ Бош Ассамблеясининг 70-сессиясида сўз олган Қозоғистон раҳбари глобал бўҳрон билан курашни «айни пайтда қонунийлик, демократия, рақобат, самарадорлик ва халқаро назорат талабларига жавоб бермаётган» дунё захира валюталари эмиссияси ва муомалада бўлиши масаласида тартиб ўрнатишдан бошлаш лозимлигини айтиб ўтди.
«XXI асрда дунёга янгича сифатга эга молиявий манбалар керак. Барқарор ривожланиш ва тараққий этиш мақсадлари ҳамда вазифаларига жавоб берадиган дунё валютасини ишлаб чиқиш бўйича БМТга аъзо давлатлар ҳаракатларини бирлаштириш талаб этилади», — дея таъкидлаган Назарбоев.
Эслатиб ўтамиз, Қозоғистон аввалроқ Евросиё иқтисодий иттифоқида (Россия, Беларусь, Қозоғистон, Арманистон, Қирғизистон) ягона валюта жорий этилишига қарши чиққан эди.
Изоҳ (0)