Гонконглик миллиардер Люй Чжихэ 60 миллион Гонконг доллари (7,7 миллион АҚШ доллари) миқдоридаги ҳар йили топшириладиган «Дунё цивилизациясига қўшган ҳиссаси учун» мукофотини таъсис этди. Бу ҳақда «РИА Новости» хабар берди.
Мукофот уч йўналишга бўлиниши кўзда тутилган. Унинг соҳибларига 20 миллион Гонконг доллари (2,58 миллион АҚШ доллари) тақдим этилади. Биринчи тақдирлаш маросими 2016 йилда бўлиб ўтади.
Мукофотлар топшириладиган йўналишлар ҳар йили ўзгариб туради. Масалан, 2016 йили «Озиқ-овқат хавфсизлиги», «Эпидемиялар, юқумли ва сурункали касалликларни даволаш» ҳамда «Ҳаётга ижобий ёндашувни илгари сургани учун» номинациялари бўйича берилади.
Люй Чжихэ 1929 йилда Хитойнинг Гуандун провинциясида туғилган. K.Wah International Holdings кўчмас мулк компанияси бошқарув раиси ҳамда Макаодаги Galaxy Entertainment Group қиморхоналар тармоғи эгаси ҳисобланади. Forbes унинг мол-мулкини 7,2 миллиард АҚШ доллари атрофида баҳолаган.
Изоҳ (0)