Россия Тергов қўмитаси Романовлар императорлик уйи аъзоларининг ҳалок бўлиши билан боғлиқ жиноий иш юзасидан текширувларни қайтадан бошлашга қарор қилди. Бу ҳақда қўмита сайтида маълум қилинган, дея хабар беради «Газета.ru».
Жиноий иш 1993 йилда Екатеринбургда аслзодаларга мансублиги тахмин қилинган мозор топилгани муносабати билан очилган эди. Экспертиза натижаси қабрлардаги суяк қолдиқлари Россия императорлик уйи аъзолари — Николай II, унинг турмуш ўртоғи Александра Романова ва фарзандлари Ольга, Татьяна ва Анастасияга тегишли эканини кўрсатди. 1998 йилда мазкур иш жиноятни содир этганлар ҳаётдан кўз юмгани туфайли тўхтатилган эди.
2007 йилда текширувлар валиаҳд Алексей Романов ва малика Мария Романова жасадларини топиш учун қайтадан бошланди. Бу нарса амалга ошиб, қабрлар топилгач ва қолдиқлар император фарзандларига тегишли эканлиги аниқлангач, иш яна ёпилган.«Тергов олдига 2011 йилдан сўнг топилган архив материаллари ҳамда мазкур жиноий ишга тааллуқли ашёвий далилларни ўрганиш вазифаси қўйилган», дейилади қўмита сайтида.
Изоҳ (0)