Сўнгги кунларда Ўзбекистоннинг айрим ҳудудларидаги, шу жумладан, Тошкент шаҳридаги баъзи автомобилларга ёқилғи қуйиш шохобчаларида автобензинга бўлган навбат кўпайиб, аҳолига муайян даражада ноқулайлик туғдирмоқда ва эътирозларга сабаб бўлмоқда. «Ўзнефтмаҳсулот» акциядорлик компанияси ушбу ҳолат юзасидан изоҳ берди.
«Таҳлилларимизга кўра, бундай ҳолатга айрим шов-шув ишқибозларининг ‘Ёнилғи ишлаб чиқариш камайиб кетганлиги сабабли, автобензин тақчиллиги юзага келиб, унинг нархи ошар экан’, деган уйдирмаларига ишонган баъзи ҳамюртларимизнинг автобензинни мумкин қадар кўпроқ заҳира қилиб олишга ҳаракат қилаётганлиги ҳам сабаб бўлмоқда.
‘Ўзнефтмаҳсулот’ акциядорлик компанияси сизларни тўлиқ ишонтириб таъкидлайдики, мамлакатимизда автобензин ва бошқа ёнилғи-мойлаш маҳсулотлари таъминоти бўйича муаммо йўқ, бўлмайди ҳам. Чунки, Республикамизда жаҳон стандартларига жавоб берадиган барча ёнилғи-мойлаш маҳсулотлари етарли миқдорда ишлаб чиқарилмоқда. Нефть хомашёси нафақат мамлакатимиз ички эҳтиёжини қондириш учун, балки муайян миқдордаги ёнилғи-мойлаш маҳсулотларини экспорт қилиш учун ҳам етарли миқдорда қазиб чиқарилиб, қайта ишланмоқда», — дейилади «Ўзнефтмаҳсулот» акциядорлик компанияси матбуот хизмати хабарида.
Бундан ташқари, компания айни кунларда юзага келган муаммони зудлик билан ҳал қилиш, камчиликларни бартараф этиш, аҳолини автобензинга бўлган эҳтиёжини тўлиқ қондириш юзасидан барча чора-тадбирлар амалга оширилаётгани ва вазият тез фурсатда ўнгланишини маълум қилди. Ёнилғи нархининг ошиши ҳақидаги турли шов-шувларга ишониб, хавфсизлик техникаси ва ёнғин хавфсизлиги қоидалари талабларига зид равишда автобензинни тўплаб қўйишга ҳам ҳожат йўқлиги таъкидланди.
Изоҳ (0)