Россия АҚШ ва Саудия Арабистони билан Сурия президенти Башар Асадни истеъфога чиқариш шартлари юзасидан музокараларга киришди. Уларда Асад вақтинчалик давлат раҳбари бўлиб турадиган ўтиш даври режаси муҳокама қилинмоқда. Бу ҳақда номи саналган мамлакатлар ва Сурия мухолифатидаги манбаларга таяниб, Bloomberg маълум қилди, дея хабар бермоқда Meduza.
Bloomberg’нинг таъкидлашича, Асаднинг ҳокимиятдан четлаштирилиши шартлари бўйича музокаралар Россия президенти Владимир Путин июнь ойида Саудия Арабистони қиролининг ўғли билан учрашганидан бери давом этмоқда.
Эслатиб ўтамиз, Россия Сурияда фуқаролар уруши бошланган 2011 йилдан бери Башар Асадни қўллаб-қувватлаб келмоқда. 2013 йилда айнан Россиянинг воситачилиги туфайли АҚШнинг Сурияга нисбатан ҳарбий операциялари тўхтатиб қолинган эди. Ҳозирги кунда ОАВда Россиянинг Суриядаги ҳарбий иштироки кўлами кенгайиб бораётгани тўғрисидаги материаллар бот-бот чоп этилмоқда.
Изоҳ (0)