Ўзбекистонлик ҳаж зиёратчиларининг Мадинаи мунаввара ва Маккаи мукаррамадаги сафарлари муваффақиятли давом этмоқда. Бугунги кунда Саудия Арабистонига етиб келган 4760 нафар ўзбекистонлик мусулмонлар учун муқаддас бўлган маконларда бўлиб, ҳаяжонли таассуротларга тўлиб-тошмоқда. Бу ҳақда Дин ишлари бўйича қўмита Ахборот хизмати хабар бермоқда.
Жумладан, Макка шаҳрида зиёратчилар «Аброж ал-Муҳаммадия» меҳмонхонасига жойлашган. Бу ерда улар учун қулай шарт-шароитлар муҳайё қилинган. Хоналар кондиционер, музлатгич, телевизор билан жиҳозланган. Алоҳида ювиниш хоналари мавжуд.
Меҳмонхонада эркаклар ва аёллар учун биринчи тиббий ёрдам кўрсатиш, профилактик муолажа ўтказиш учун зарур воситалар билан тўла жиҳозланган тиббиёт марказлари фаолият кўрсатмоқда. Ўзбекистонлик зиёратчилар учун барча дори-дармонлар Ўзбекистондан олиб келинган.
Зиёратчиларга эрталабки нонуштада асал, пишлоқ, тухум, сариёғ, сут, ширинликлар, тушки ва кечки овқатланишда эса иссиқ таом, қатиқ, мева ва табиий шарбатлар берилмоқда.
«Бугунги кунда муқаддас ҳаж амалларини бажариш учун Саудия Арабистонига келган ҳорижий зиёратчиларнинг сони тўққиз юз мингдан ошиб кетди. Улар орасида зиёратчиларимизнинг адашиб қолмасликлари учун кўкрак нишонлари, махсус тикилган нимча ва сафар халталари жуда қўл келмоқда.
Мадина шаҳридан Маккаи мукаррамага етиб келган зиёратчиларимиз овқатланиб ва ҳордиқ чиқарган ҳолда гуруҳ бошлиқлари етакчилигида автобусларда Каъбаи муаззамага бориб, Байтуллоҳни тавоф, Сафо ва Марва орасида саъй қилмоқда», — дейилади хабарда.
Ишчи гуруҳи раҳбарияти томонидан ҳар куни зиёратчилар билан учрашувлар ўтказилиб, яқин кунларда амалга ошириладиган ҳаж амалларини шаръий жиҳатдан тўлақонли, бекаму-кўст ва уюшқоқлик билан амалга ошириш, ҳожилар ўз саломатликларини авайлаб-асрашлари, юзага келиши мумкин бўлган мураккаб шароитларда ўз хавфсизликларини таъминлашлари юзасидан зарур тушунча ва тавсиялар бериб борилмоқда.
Изоҳ (0)