Британия кенгаши раиси сэр Вернон Жейм Эллис 7-8 сентябрь кунлари илк расмий ташриф билан Ўзбекистонда бўлди. «Gazeta.uz» хабарига кўра, у бир қатор вазирлар, шунингдек, Британия кенгашининг лойиҳалари иштирокчилари ва ҳамкорлари билан учрашди.
«Сэр Вернон Эллиснинг икки кунлик ташрифи — таълим ва маданият соҳасидаги икки томонлама муносабатлар учун жуда муҳим воқеадир. Бу Британия кенгашига 2010 йилдан бери раҳбарлик қилаётган сэр Верноннинг Ўзбекистонга илк ташрифидир», — дейди Ўзбекистондаги Британия кенгаши директори Марк Кросси.
Унинг сўзларига кўра, сэр Вернонга Тошкент жуда ёққан, у Амалий санъат музейида бўлиб, Ўзбекистон амалий санъати ва анъанавий ўзбек мусиқасидан жуда таъсирланган. Британия кенгаши раиси Тошкентдаги Раҳимовлар сулоласининг сопол мактабида сопол идишларни тайёрлаш жараёнида ҳам қатнашишга улгурди.
«Жаноб Вернон вазирликларнинг раҳбарлари билан Ўзбекистон ва Буюк Британия ўртасида олий ва ўрта махсус таълим соҳасидаги ҳамкорликнинг кейинги истиқболлари борасида келишиб олди. Шунингдек, Ўзбекистондаги Британия кенгашининг санъат соҳасидаги янги дастури бўйича ва инглиз тилини ўқитиш соҳасидаги ҳамкорлик дастурларини кўпайтириш бўйича ҳам келишувларга эришилди», — дейди Кросси.
Ташриф якунларига кўра, сэр Вернон шундай деди: «Ўзбекистон билан ҳамкорлик алоқаларимиз аъло даражадаги натижаларга эга ва биз Буюк Британиянинг улкан мероси ҳамда айни вақтда Ўзбекистон учун истиқболли эҳтиёж бўлган инглиз тили соҳасидаги янги лойиҳаларни сабрсизлик билан кутмоқдамиз. Табиийки, Британия кенгаши мазкур йўналишда асосий ҳамкор ҳисобланади».
Изоҳ (0)