Навоий вилояти ҳокимлигининг «Дўстлик байроғи» газетаси 11 сентябрь сонида 2 сентябрь куни соат 8:50 да «Навоийазот» АЖнинг 1-цехида юз берган фавқулодда ҳолат юзасидан ахборот берди.
«2-сентябр куни эрталаб соат 8:50 да «Навоийазот» АЖнинг 1-цехида фавқулодда ҳолат содир бўлди. Бунинг натижасида 11 киши енгил тан жароҳати олди. Бу ҳолатдан жабрланганлар корхона ҳудудидаги шифохонага етказилиб, керакли тиббий ёрдам кўрсатилди. Жароҳатланганларнинг 7 нафари шифохонада ётиб даволанишни рад этишди, 1 нафарига эса кейинги кун жавоб берилди», — дейилади газета хабарида.
Қайд этишларича, корхона маъмурияти ва барча ходимларининг тезкор ва уюшқоқлик билан олиб борган ҳаракатлари натижасида ҳодиса оқибатлари бартараф этилиб, цехнинг ишлаб чиқариш кўрсаткичлари аввалги даражага кўтарилди. Ўз навбатида, «Дўстлик байроғи» газетаси «айрим шубҳали электрон оммавий ахборот воситаларининг ушбу ҳолат юзасидан ёритган хабарлари ҳақиқатга тўғри келмаслиги» ҳақида ёзади.
«Уларнинг саҳифаларида кимё заводи раҳбарияти жабрланганлар ва «қурбон бўлган»лар ҳақидаги маълумотлар ҳамда воқеа сабабларини сир тутишаяпти, деган бўҳтон гаплар урчиб кетди. Интернетда берилаётган маълумотлар атайин «шов-шув» кўтариш учун ўйлаб топилган, бўрттирилган. Ушбу хатти-ҳаракатлар сайтларнинг оммабоплигини ошириш мақсадида, гўёки йирик кимё ишлаб чиқариш корхонасида юз берган «портлаш» атрофида «пашшадан фил ясаш»дан ўзга нарса эмасдир», — деб ёзади газета.
Хабар беришларича, ҳозирги вақтда бўлиб ўтган воқеани текшириш учун махсус комиссия тузилиб, воқеа сабабларини ўрганиш устида иш олиб борилмоқда.
Изоҳ (0)