Голливуд актёри Арнолд Шварценеггернинг ўғли Патрик телевидениеда дебют қилади. «ТАСС» хабарига кўра, унга «Қичқириқ қироличалари» («Scream Queens») сериалидан роль теккан.
«Сериалнинг биринчи фасли жорий йилнинг 22 сентябрдан FOX телеканали орқали намойиш этила бошлайди», — деб ёзади ABC телеканали. 21 ёшли Патрик билан бирга мазкур сериалда актрисалар Эмма Робертс, Ариана Гранде, Жейми Ли Кёртис ва актёр Ник Жонас ҳам суратга тушган.
«Қичқириқ қироличалари» сериали қўрқинчли фильмлар жанридаги комедия бўлиб, мазкур картинада Патрик Шварценеггерга айнан қайси рол текканини сериал ижодкорлари ҳозирча сир тутмоқда.
Патрик сериалларда илк бор суратга тушаётганига қарамай, катта кинода бир неча роль ўйнашга улгурган. Хусусан, 2015 йил охиригача унинг иштирокидаги икки фильм — АҚШ президенти Франклин Делано Рузвельтнинг турмуш ўртоғи ҳақидаги «Қадрли Элеонора» ва қўрқинчли фильмлар жанридаги «Скаутнинг зомби-қиёмат юз берган вақтдаги қўлланмаси» картинаси экранларга чиқади.
Бундан ташқари, яқин вақт ичида Патрик Шварценеггер япониялик режиссёр Норихидо Коизуми томонидан 2006 йилда суратга олинган «Тун ярмидаги қуёш» романтик мелодрамасининг ремейкида ҳам бош ролни ижро этади.
Изоҳ (0)