Американинг Legendary Pictures компанияси Годзилланинг Кинг Конг билан тўқнашуви ҳақида ҳикоя қилувчи янги лойиҳани ишга туширади. Deadline хабарига кўра, студия Warner Bros. билан тегишли музокаралар олиб бормоқда.
Ҳозирги вақтда Legendary томонидан суратга олинаётган «Кинг Конг: Чаноқ ороли» фильми ҳуқуқлари Warner ихтиёрига ўтади. Годзилла персонажи айнан шу компанияга тегишли. Фильм премьераси 2017 йил мартига мўлжалланган. Режиссёр Жордан Вот-Роберц томонидан суратга олинадиган фильмда бош ролларни Том Хиддлстон, Бри Ларсон ва Семюэль Л. Жексон ижро этади.
Фильм воқеалари Кинг Конг илк бор 1933 йилги фильм қаҳрамонлари томонидан топилган Чаноқ оролида, шунингдек, 1970 йилларда, Детройт шаҳрида юз беради. Суратга олиш ишлари 2015 йил охирида ёки келаси йил бошида бошланади. Сюжет тафсилотлари ва премьера санаси сир сақланмоқда.
Нашр маълумотларига кўра, «Чаноқ ороли» ва айни вақтда Warner Bros. ишлаб чиқаётган «Годзилла»нинг сиквели кейинчалик маҳлуқлар қарама-қаршилиги ҳақидаги яна бир фильм билан давом эттирилади. Маълумот учун, режиссёри Гарет Эдвардс бўлган «Годзилла 2» сиквели 2018 йилда катта экранларга чиқиши керак.
Икки улкан монстр бунгача 1962 йили Исиро Хонда томонидан суратга олинган «Кинг Конг Годзиллага қарши» фильми орқали илк бор бирга экранларда пайдо бўлган. Бу фильмда улкан маймун Годзилла ҳужумига учраган Япония шаҳарларидан бирини ҳимоя қилади.
Изоҳ (0)