Тошкент шаҳрида ташкил этилган «Хитой киноси кунлари» доирасида Ўзбекистонда бўлган Хитой делегацияси вакиллари 8 сентябрь куни «Ўзбеккино» Миллий агентлиги раҳбарияти ва ўзбекистонлик киноижодкорлар билан учрашув ўтказди. Бу ҳақда «Ўзбеккино» матбуот хизмати хабар бермоқда.
Учрашувда икки мамлакат ўртасида фильмлар алмашинувини ташкил этиш, Ўзбекистон ва Хитой киноижодкорларини жалб этган ҳолда қўшма фильмлар суратга олиш, мультпликация соҳасида ҳамкорлик қилиш, ўзаро тажриба алмашинувини йўлга қўйиш, шунингдек, Хитойда Ўзбекистон киноси кунларини ўтказиш ва Хитойдаги нуфузли халқаро кинофестивалларда ўзбек фильмларининг иштироки учун шарт-шароит яратиш каби масалалар муҳокама қилинди.
Хитой делегацияси раҳбари Луан Чжиго самимий ва илиқ қабул учун миннатдорчилик билдириб, Хитой томони Ўзбекистон билан кинематография соҳасидаги ҳамкорликни турли йўналишларда ривожлантиришга тайёр эканлигини маълум қилди. Меҳмоннинг қайд этишича, 2016 йилнинг апрель ойида Хитойда Ўзбекистон киноси кунларини юқори савияда ўтказиш имконияти мавжуд, 2015 йилнинг октябрь ойида эса Хитойда ўтказилиши режалаштирилган «Буюк ипак йўли» халқаро кинофестивалига ўзбекистонлик ижодкорлар томонидан суратга олинган фильмларни тавсия этиш мумкин.
«Хитойлик киноижодкорлар билан алоқанинг ўрнатилиши бу ўзбек кинематографияси учун ҳам ижобий қадам бўлади, икки давлат ҳукуматлари қўшма фильм суратга олишга қарор қиладиган бўлса, бу жараёнда фаол иштирок этишга доим тайёрман», – деди учрашувда қатнашган режиссёр Аюб Шаҳобиддинов. Унинг хитойлик ҳамкасби, «Хитой киноси кунлари»ни очиб берган ва томошабинлар эътирофига сазовор бўлган «Самимий севги» («Меҳр-муҳаббат») бадиий фильми режиссёри Шерзод Ёқуб ўзи фаолият олиб борадиган «Тяншан» киностудиясини ҳамкорликда ишлаб чиқариладиган фильмга жалб этиш мумкинлигини айтиб ўтди.
Изоҳ (0)