«Оила даврасида» газетасида «Love story ёхуд тўйдаги томоша» номли мақолада ўзбек тўйларида пайдо бўлаётган янги одатлар танқид қилинди.
Мақола муаллифи ўз дугонасининг никоҳ тўйида юз берган ҳолатларни мисол қилиб келтирди.
«Бир дугонам турмушга чиқадиган бўлди. Ўзи жуда ақлли, оиласи ҳам зиёли. Куёв ҳам ўзига яраша хислатларга эга. Бунинг устига, хориж олийгоҳларидан бирини тамомлаган. Тўйга ҳам оз вақт қолди, дугонам ҳам, куёв бўлмиш ҳам жуда ҳаяжонда.
Тўй жуда ҳашаматли тўйхонада бўлиб ўтди. Меҳмонларнинг эса кети узилмади. Дугонам ҳам худди маликалардек. Тўйнинг айни авж нуқтасида чироқлар ўчди. Икки қалбнинг севги қиссалари бошланиб кетди. Экранда инглизча катта ёзувларда Love story сўзи пайдо бўлди. Тўйларда бу ‘удум’ни илгари ҳеч учратмагандим. Катта экранда йигит ва қизнинг табиат қўйнида, замонавий кийимларда сайр қилиб юриши, қўл ушлашиб боғ қўйнида дам олаётгани акс этган эди», — дейилади мақолада.
Муаллиф бу нималигини сўраганда, унинг дугонаси бу — замон билан ҳамнафаслик эканлиги, ҳозир чет элда Love story мода эканлигини айтган. Мақола муаллифи «Келинлар қўзғолони» фильмидаги Фармонбибининг: «Хўрозқанд чет элники деса, ётволиб ялашади булар», деган гапларини ёдга олган.
Шундан кейин келин-куёв вальсга тушган.
«Ўзбек менталитети қабул қиладими бу ҳолатни? Улар хориж фильмларидагидек катта даврада ёлғиз вальсга тушди. Кимдир бу ҳолатни шунчаки қабул қилди, кимгадир эриш туюлди. Куёв бўлмиш бир умрлик жуфти-ҳалолини ҳаммага ‘реклама’ қилгандек, кўз-кўз қилиши шартмиди? Хорижда ўқиган бўлса, у ердаги удумларнинг бизга нима дахли бор, ўша ерда қолдириш керак. Ўзимизда шундай чиройли урф-одатлар, анъаналар турганда... Ота-оналар-чи? ‘Фарзандим шуни хоҳлади, ҳаммаси у айтганидек бўлади’, деб ўтираверса, келажак авлодга нима қолади? Ҳамма нарсанинг ҳам чек-чегараси бўлиши керак эмасми?», — дейилади мақолада.
Изоҳ (0)