Ўзбекистон Республикаси Президентининг 2013 йил 18 июндаги «Ангрен-Поп электрлаштирилган темир йўл линияси қурилишини ташкил этиш чора-тадбирлари тўғрисида»ги қарори асосида бунёд этилаётган мазкур электрлаштирилган темир йўл линияси энг аввало мамлакатда ягона миллий темир йўл тармоғи яратиш имконини беради, деб ёзади «Ўзбекистон темир йўллари» АЖ матбуот хизмати.
Ушбу темир йўлнинг узунлиги 123,1 км ни ташкил этади. Лойиҳанинг туннелдан ташқари қисмида, яъни туннелнинг иккита порталига олиб борувчи йўналишда кўзда тутилган барча ишлар мустақиллик байрами арафасида тўлиқ тугатилди. Ушбу ҳудудда 43 миллион куб метр тупроқ ишлари ҳамда 16,3 миллион куб метр бурғулаш-портлатиш ишлари тўлиқ амалга оширилди.
Лойиҳа асосида 285 та сунъий иншоот ва сув ўтказиш қувурлари, умумий узунлиги 2,1 км ни ташкил этувчи 13 та темирйўл кўприги, 6 та йўл ўтказгич, 4 та темир йўл станцияси, 4 та разезд ва 2 та вокзал қуриб битказилди.
Лойиҳа доирасида 19,1 км узунликда қурилаётган темир йўл туннелининг асосий стволини қазиш ишлари ғарбий ва шарқий порталлар ва қўшимча учта ёнбош шахталарда олиб борилиши натижасида бугунги кунгача 14 километр узунликда туннель қазилди. Қўшимча туннелда эса қарийб 15 километр узунликда қазиш ишлари бажарилди. Шунингдек, 10 км дан ошиқ пардозлаш ишлари амалга оширилди.
Ангрен-Поп электрлаштирилган темир йўл линияси қурилиши лойиҳаси мураккаблиги бўйича дунё миқёсида биринчи 8 таликдан, лойиҳа доирасида қурилаётган туннель узунлиги бўйича биринчи 13 таликдан жой олган.
Ушбу лойиҳа амалга оширилиши натижасида юкларни ташиш бир неча баробар арзонлашади, уларни етказиб бериш муддати эса икки марта қисқаради.
Изоҳ (0)