Жезказган Йўл-патруль хизмати ходими Ардак Алкеев йўл ҳаракати қоидаларини бузганлиги ва хизмат вазифасини бажариш чоғида автоҳалокатни келтириб чиқарганлиги учун ишдан бўшатилди. Бу ҳақда «Tengrinews.kz» хабар беради.
Расмий маълумотларга қараганда, 2014 йилнинг 6 август куни полиция ходимига тўй кортежларига нисбатан рейдни амалга ошириш давомида раҳбарият томонидан қоидабузарларни қўлга олиш вазифаси юклатилган. Алкеев уларнинг ортидан таъқиб эта бошлаганда, ҳайдовчилар тезликни ошириб, бошқа автомобилларнинг ҳаракатланишига халақит берувчи тарзда ҳаракатлана бошлаган. Шунда полициячи ҳам улар каби ҳаракатланиб, ЙТҲнинг юзага келишига сабаб бўлган.
Ишдан озод этилган полициячи судга лавозимни тиклаш тўғрисида даъво киритган. Бироқ яқинда бўлиб ўтган суд собиқ полициячи даъвосини қаноатлантиришни рад этди.
Изоҳ (0)