Молдова пойтахти Кишинёв шаҳри кўчаларидаги ҳукуматга қарши оммавий норозилик намойишларида юз мингга яқин одам иштирок этмоқда. Бу ҳақда «Vesti.ru» хабар бермоқда.
Намойишлар томонидан ўнга яқин талаблар илгари сурилмоқда. Улар орасида 2016 йил баҳоригача муддатидан аввалги парламент сайловларини ўтказиш, президент сайловини парламентдан бевосита халққа топшириш, мамлакат президенти Николай Тимофтини, Молдова Бош прокуратураси ва Миллий банки раҳбариятини истеъфога чиқариш кабилар бор.
Бундан ташқари, 2014 йил охирида мамлакат тижорат банкларидан оффшорларга олиб чиқиб кетилган бир миллиард еврони ҳам мамлакатга қайтариш намойишчиларнинг асосий талабларидан бири бўлиб турибди.
Қайд этишларича, бу 2015 йил баҳоридан бери Молдовада кузатилаётган камида тўртинчи йирик норозилик намойишларидир. Сиёсий талаблар билан бирга маиший муаммолар — электр ва газ нархининг ошиши, нон ва бошқа маҳсулотлар нархининг қимматлашуви кабилар ҳам кўпайиб бормоқда.
30 июль куни иш бошлаган янги вазирлар маҳкамаси мазкур муаммоларга қарши қандай курашиши ҳозирча номаълум, бироқ ҳукумат ўз олдига евроинтеграцияни давом эттириш, Россия билан муносабатларни жонлантириш, НАТО билан ҳамкорликни сақлаб қолиш каби муҳим вазифаларни қўйган.
Изоҳ (0)