Германияда Lufthansa авиакомпанияси учувчилари иккинчи кундирки иш ташлаш ўтказмоқда. «Сегодня.ua»нинг хабар беришича, фуқаро авиацияси учувчилари касаба уюшмаси — Vereinigung Cockpit эълон қилган иш ташлашга 9 сентябрь куни яқин ва ўрта масофалардаги рейсларда хизмат қилувчи учувчилар ҳам қўшилади.
Аввалроқ, 8 сентябрь куни узоқ масофаларга парвоз қилувчи учувчилар бошлаб берган иш ташлаш натижасида Франкфурт, Мюнхен, Дюссельдорф ва бошқа шаҳарлардаги 84 рейс бекор қилинган эди. 9 сентябрдаги норозилик намойиши натижасида эса юзлаб рейслар бекор қилиниши мумкин ва Lufthansa бу ҳақда йўловчиларни огоҳлантиришни бошлаган.
Умуман, 9 сентябрь куни Lufthansa компанияси тизимидаги авиакомпаниялар жами 1520 та, жумладан, 1350 та ички ва Европа доирасида ҳамда 175 та қитъалараро парвозни амалга ошириб, 180 минг йўловчини манзилига етказиб қўйиши кўзда тутилган эди.
Қайд этиш жоиз, 2014 йил апрелидан бери Lufthansa учувчилари 12 марта иш ташлаш уюштирди. Хабар беришларича, ўтган йилги иш ташлашлар натижасида авиакомпания кўрган умумий зарар миқдори 300 миллион евродан ошиб кетган.
Изоҳ (0)