Таиландда Миллий ислоҳотлар кенгаши (МИК) тасдиқлаш учун тақдим этилган конституциянинг янги лойиҳасини рад этди. «ТАСС» хабарига кўра, кенгашнинг 134 аъзоси лойиҳага қарши овоз берди, 105 нафари эса уни қўллаб-қувватлади.
Конституция лойиҳасининг йўққа чиқарилгани умуммиллий парламент сайловлари яна қолдирилишини билдиради. Аввалроқ Таиланд ҳукумати, агар бир неча ой давомида ишлаб чиқилган конституция лойиҳаси МИК томонидан қабул қилинса, 2016 йил сентябрида сайловларни ўтказиш ва мамлакатни демократик ривожлантириш йўлига қайтаришга ваъда берганди.
Қайд этиш жоиз, конституциянинг асосий талаблари қиролликнинг асосий сиёсий кучлари томонидан танқид остига олинди. Хусусан, мамлакатда ҳарбий кенгаш тузилиши ва сиёсий бошбошдоқлик юзага келганида, мазкур кенгаш ҳокимиятни фуқаролик ҳукуматидан олиши ҳақидаги талаб кўплаб сиёсатчиларнинг кескин норозилигига сабаб бўлди.
Таиланд бош вазири ўринбосари Виссан Креа-Нгамнинг маълум қилишича, янги конституция лойиҳасини ишлаб чиқиш учун янги Миллий ислоҳотлар кенгаши тузилади ва унга олти ой вақт берилади, кенгаш тайёрлаган лойиҳа референдумда овозга қўйилади. Бу ҳолатда парламент сайловлари 2016 йилда эмас, балки ундан кейинги — 2017 йилда ўтказилади.
Таиландда 2014 йил 22 май куни, қиролликда бир неча ой давом этган норозилик намойишларига жавобан, ҳарбий тўнтариш юз берганди. Оқибатда фуқаролик ҳукумати ағдарилиб, конституция бекор қилинган, ҳокимият тепасига генерал Прают Чан-Оча бошлиқ сайланмаган ҳарбийлар ҳукумати келганди.
Изоҳ (0)