Колумбия қуролли кучларининг Мета департаменти ўтказган махсус операцияси давомида Колумбия инқилобий қуролли кучлари (КИҚК)нинг тўрт нафар жангариси йўқ қилинди. Бу ҳақда «ТАСС» хабар бермоқда.
Колумбия мудофаа вазири Луис Карлос Вилегаснинг маълум қилишича, махсус операция натижасида тўрт жангари йўқ қилинган, уч жангари тан жароҳати олган, 5 милтиқ, 7 та зирҳли нимча, дала анжомлари ва алоқа воситалари мусодара қилинган.
Ҳалок бўлган жангарилар орасида КИҚКнинг 27-фронтини молиялаштиришга масъул бўлган «Флако» лақабли жангари ҳам бўлган. Қайд этишларича, исёнчиларнинг мазкур фронти сўнгги 13 йил давомида Гранада, Виста Эрмоса ва Макарена ҳудудларидаги одам ўғирлашлар ва товламачиликларни уюштириб келган.
Эслатиб ўтамиз, КИҚК раҳбарлари ўз жангариларига 20 июль куни ўт очишни бир томонлама тўхтатиш ҳақида буйруқ берганди. Бунга жавобан 25 июль куни Колумбия президенти Хуан Мануэль Сантос КИҚК қароргоҳларига авиазарбалар беришни тўхтатиш ҳақида кўрсатма берди.
Изоҳ (0)