Tailandning yangi konstitutsiyasi loyihasi Milliy islohotlar kengashi tomonidan rad etildi
Tailandda Milliy islohotlar kengashi (MIK) tasdiqlash uchun taqdim etilgan konstitutsiyaning yangi loyihasini rad etdi. “TASS” xabariga ko‘ra, kengashning 134 a’zosi loyihaga qarshi ovoz berdi, 105 nafari esa uni qo‘llab-quvvatladi.
Konstitutsiya loyihasining yo‘qqa chiqarilgani umummilliy parlament saylovlari yana qoldirilishini bildiradi. Avvalroq Tailand hukumati, agar bir necha oy davomida ishlab chiqilgan konstitutsiya loyihasi MIK tomonidan qabul qilinsa, 2016-yil sentabrida saylovlarni o‘tkazish va mamlakatni demokratik rivojlantirish yo‘liga qaytarishga va’da bergandi.
Qayd etish joiz, konstitutsiyaning asosiy talablari qirollikning asosiy siyosiy kuchlari tomonidan tanqid ostiga olindi. Xususan, mamlakatda harbiy kengash tuzilishi va siyosiy boshboshdoqlik yuzaga kelganida, mazkur kengash hokimiyatni fuqarolik hukumatidan olishi haqidagi talab ko‘plab siyosatchilarning keskin noroziligiga sabab bo‘ldi.
Tailand bosh vaziri o‘rinbosari Vissan Krea-Ngamning ma’lum qilishicha, yangi konstitutsiya loyihasini ishlab chiqish uchun yangi Milliy islohotlar kengashi tuziladi va unga olti oy vaqt beriladi, kengash tayyorlagan loyiha referendumda ovozga qo‘yiladi. Bu holatda parlament saylovlari 2016-yilda emas, balki undan keyingi — 2017-yilda o‘tkaziladi.
Tailandda 2014-yil 22-may kuni, qirollikda bir necha oy davom etgan norozilik namoyishlariga javoban, harbiy to‘ntarish yuz bergandi. Oqibatda fuqarolik hukumati ag‘darilib, konstitutsiya bekor qilingan, hokimiyat tepasiga general Prayut Chan-Ocha boshliq saylanmagan harbiylar hukumati kelgandi.
