Хитой пойтахти Пекин шаҳрида ўтказилаётган жаҳон чемпионатида баландликка сакраш секторида иштирок этаётган ўзбекистонлик Светлана Радзивил 1 метр 92 сантиметр натижа кўрсатиб, навбатдаги босқичга чиқди. Бу ҳақда «Olamsport.com» хабар бермоқда.
Нашр эслатишича, мазкур жаҳон чемпионатида 1 метр 94 сантиметр баландликни забт этган атлетлар XXXI ёзги Олимпиада ўйинлари йўлланмаси учун белгиланган меъёрни бажаради. Светлана Радзивил аввалги мусобақаларда белгиланган меъёрни бажариб бўлган ва эндиликда жаҳон чемпионатининг медаллари учун кураш олиб боради. Кейинги босқич мусобақалари 28 август куни бўлиб ўтади.
Шу кунга қадар бўлиб ўтган мусобақалар якунларига кўра, умумжамоа ҳисобида Кения давлати вакиллари 6 та олтин, 3 та кумуш ва 2 та бронза медалларини қўлга киритган ҳолда якка пешқадам бўлиб турибди. Иккинчи ўринда бораётган Буюк Британия спортчилари 3 та олтин медалга сазовор бўлган бўлса, кучли учликни якунлаб турган Ямайка вакиллари ҳисобида 2 та олтин ва 1 та бронза медали мавжуд.
Маълумот учун, мазкур жаҳон чемпионатида 207 давлатдан 2000 нафардан зиёд спортчи иштирок этмоқда. Мусобақалар 30 августга қадар ўтказилади.
Изоҳ (0)