Малайзиянинг Таиланд билан чегарадош ҳудудида янги оммавий қабристонлар топилди. «ТАСС» хабарига кўра, мазкур қабрларга, катта эҳтимол билан, мьянмалик ва бангладешлик қочоқлар кўмилган.
Дастлабки маълумотларга кўра, қабристонда тахминан 24 кишининг жасади бўлиши мумкин. Малайзия хавфсизлик кенгаши котиби Шаҳидан Қосимнинг сўзларига кўра, «кучли ёмғирлар мазкур ҳудудни ювиб ўтган ва бир неча кун аввал қабристон топилган».
Унинг қўшимча қилишича, «қабристондаги жасадлар айнан ноқонуний муҳожирларга тегишлими-йўқми, буни айтиш қийин, шунингдек, қабристон айнан қачон пайдо бўлгани ҳам аниқ эмас». Ҳуқуқни муҳофаза қилиш органларидаги манбаларнинг маълум қилишича, бу одамлар «очлик ёки қийноқдан вафот этган».
Бир неча ой аввал Малайзия ғарбидаги Таиланд билан чегарадош ҳудудда меҳнат муҳожирлари кўмилган 100 дан ортиқ оммавий қабристонлар, шунингдек, мьянмаликларни зўрлик билан ушлаб туриш учун мўлжалланган 28 та лагерь топилган эди. Малайзия ташқи ишлар вазири Аҳмад Зоҳид Ҳамидийнинг сўзларига кўра, «бу жойлар камида беш йилдан бери мавжуд бўлган».
Изоҳ (0)