Россия бош вазири Дмитрий Медведевнинг Курил оролларидан бири — Итурупга ташрифи сабаб Япония Ташқи ишлар вазирлиги Россия томонига норозилик билдирди. Бу ҳақда «Ведомости» хабар бермоқда.
Япониянинг «Майнити» нашри маълумотларига кўра, Япония ТИВнинг Европа ишлари бўйича департаменти раҳбари Хадзимэ Хаяси телефонда Россиянинг Япониядаги элчиси Евгений Афанасьев билан боғланиб, Медведевнинг Итурупга ташрифи Япониянинг нуқтаи назарига зид эканлигини ва япон халқига оғир ботишини айтиб ўтган.
Бундан ташқари, аввалроқ Япония ташқи ишлар вазирлиги, Медведевнинг Курилга сафари сабаб, ТИВ раҳбари Фумио Кисиданинг Россияга ташрифи санасига ўзгартириш киритиш масаласини кўриб чиқаётганини маълум қилганди. «Ҳар ҳолда, ҳозир Россия ва Япония ўртасида олий даражада мулоқотни давом эттирса бўладиган вазият кузатилмаяпти», — деганди Япония ТИВдаги манба.
Маълумот учун, Дмитрий Медведев 22 август, шанба куни ишчи ташриф билан Курил оролларига келди. Япония ҳукумати мазкур ташрифдан бир неча ҳафта илгари Россия бош вазирининг бўлажак сафари Япония ва Россия ўртасидаги сиёсий мулоқот ривожига жиддий тўсиқ бўлиши мумкинлигидан огоҳлантирган эди.
Япония ва Россия ўртасидаги ҳудудий баҳс Иккинчи жаҳон уруши давридан бери давом этиб келади — уруш якунларига кўра, Курил ороллари собиқ СССР таркибига қўшиб олинган. Япония Итуруп, Кунашир, Шикотан ва Хабомаи оролларига даъвогарлик қилиб келади. Россия нуқтаи назарига кўра, Жанубий Курил ороллари Иккинчи жаҳон уруши якунларига кўра собиқ СССР таркибига кирган ва уларнинг суверенитетига шубҳа қилиб бўлмайди.
Изоҳ (0)