Қозоғистонда депозитлар бўйича курс фарқини компенсация қилиш механизми ишлаб чиқилади

Қозоғистон Миллий банки ва Қозоғистон депозитларни кафолатлаш жамғармаси аҳолининг тенгедаги муддатли депозитлари бўйича курс фарқидаги компенсацияни қоплаб бериш механизмини ишлаб чиқиш бўйича ишчи гуруҳ тузди. Бу ҳақда «РИА Новости» хабар бермоқда.

20 август, пайшанба кунидан бошлаб Қозоғистон тенгенинг эркин алмашинувчи курсига асосланган янги пул-кредит сиёсатини амалга оширишга киришди ва валюта коридорини бекор қилди. Қозоғистон фонд биржаси (KASE)да 19 август, чоршанба куни доллар курси 188,38 тенгега тенг бўлган бўлса, 20 август тонгида 255,26 тенгегача кўтарилди. Президент Нурсултон Назарбоевнинг сўзларига кўра, мамлакат иқтисодиётининг рақобатбардошлигини қайта тиклаш ва захираларни сақлаб қолиш учун шундан бошқа йўл қолмаган.

Янги ташкил этилган ишчи гуруҳдан Миллий банк, иккинчи даражадаги банклар, Қозоғистон молиячилар уюшмаси ва Қозоғистон депозитларни кафолатлаш жамғармаси вакиллари ўрин олган. Қайд этишларича, 2015 йилнинг 18 августига қадар ҳисобида кўпи билан 1 миллион тенгегача қолган жисмоний шахсларнинг муддатли депозитлари, мазкур депозит маблағлари кейинги бир йил давомида банкнинг махсус ҳисоб рақамида қолиши шарти билан, компенсация қилиб берилади.

Аввалроқ, Қозоғистон президенти Нурсултон Назарбоев мазкур чора 1,7 миллион нафар қозоғистонликни қўллаб-қувватлашга ёрдам беришини таъкидлаганди. Қайд этиш жоиз, бу мамлакатдаги барча депозиторларнинг 86 фоизини ташкил этади.