Ҳар йили 1,5 млн бола эмланмагани туфайли вафот этиши маълум бўлди

Дунёда ҳар йили 1,5 миллион нафар бола олдини олиш мумкин бўлган юқумли касалликлардан вафот этади, бунга уларнинг эмланмагани сабаб бўлади, дея хабар бермоқда «ТАСС« Жаҳон соғлиқни сақлаш ташкилотига таяниб.

«Ўзларини ёки фарзандларини ўз вақтида эмламайдиган ёки эмлашдан бош тортадиган кишилар иммунизация соҳасида олдинга интилаётган мамлакатлар учун қийинчиликлар туғдиради. Дунёда ҳар бешинчи болага ҳаёт учун муҳим эмлашлар қилинмайди ва ҳар йили 1,5 миллион бола вакцина билан олдини олиш мумкин бўлган касалликлардан вафот этади», — дейилади ташкилот хабарида.

Таъкидланишича, эмлашга бўлган салбий муносабат уларнинг самарадорлигидан шубҳаланиш, муайян вакцина ҳақида етарлича маълумотга эга бўлмаслик, шифокорлар ёки бутун соғлиқни сақлаш тизимига ишонмаслик каби сабаблардан келиб чиқади.

Ташкилотдагилар эмлаш ҳақидаги барча миш-миш ва қўрқувларга барҳам бериш орқали аҳоли билан ишлашни яхшилашга умид қилмоқда.