Хитойнинг Тяньцзинь порт шаҳридаги саноат ҳудудида янги портлашлар юз берди. Бу ҳақда «РБК» хабар бермоқда.
Навбатдаги портлашлар оқибатида аввал портлаш қайд этилган омборхонада яна ёнғин келиб чиққан. Шаҳарнинг бир қисми тутун остида қолган. Тахминларга кўра, автотураргоҳда қолдирилган автомобиллар портлаб кетган бўлиши мумкин.
Маҳаллий маъмурият ҳодиса жойидан уч километр масофада истиқомат қилувчи аҳолини хавфсиз ҳудудларга кўчириш ҳақида кўрсатма берган. Қайд этишларича, портлаш юз берган омборхонада камида 700 тонна натрий цианиди бор.
Айни вақтда, Хитой ҳукумати мамлакатдаги барча кимёвий ва портловчи моддалар сақланувчи омборхоналардаги шароитларни текшириб чиқиш ҳақида кўрсатма берган. Тяньцзиндаги саноат ҳудудини бошқарувчи компания раҳбари эса хавфсизлик қоидаларини «қўпол равишда бузишда» айбланмоқда.
Эслатиб ўтамиз, Тяньцзинда 12 август куни рўй берган дастлабки икки портлаш натижасида қурбон бўлганлар сони 85 кишига етди, яна 700 дан ортиқ одам турли даражада тан жароҳати олган.
Изоҳ (0)