Cassini зонди Ерга кенг бурчакли камера ёрдамида инфрақизил фильтрни татбиқ этиш орқали олинган Сатурннинг ноодатий суратини йўллади. «Корреспондент.net» хабарига кўра, бу каби суратлар олимларга сайёра атмосферасидаги булутлар жойлашувини белгилашга ёрдам беради.
Cassini мазкур суратни тахминан 1,5 миллион километр масофадан туриб тасвирга олган. Сурат кўлами бир пиксел учун 89 километрга тенг.
Аввалроқ олимлар Cassini зонди орқали олинган маълумотлар асосида Сатурннинг Энцеладе номли йўлдошининг музости океанидаги кимёвий шароитлар ҳаётнинг пайдо бўлиши ва мавжуд бўлиши учун мос келишини аниқлаган эди. Бундан ташқари, Сатурннинг совуқ йўлдоши — Титанда метан ва кислородсиз асосдаги ҳаёт намуналари бўлиши мумкинлиги аниқланган эди.
Сатурн ва унинг йўлдоши — Титанни тадқиқ этиш мақсадида АҚШ, Европа ва Италия аэрокосмик агентликлари томонидан биргаликда ишлаб чиқилган Cassini-Huygens зонди 1997 йил учирилган бўлиб, 2004 йил 1 июль куни Сатурн орбитасига етиб борган, 2005 йил 14 январида эса Huygens зонди Титан сатҳига қўнганди.
Изоҳ (0)