Халқаро энергетика агентлигининг огоҳлантиришича, санкциялар бекор қилиниши билан Эрон жаҳон нефть бозорига катта тезликда кириб келади. «Gazeta.ru»нинг ташкилот ҳисоботига асосланиб хабар беришича, бу ҳолат жаҳон бозорида нефть нархининг кескин пасайишига сабаб бўлиши мумкин.
ХЕА маълумотларига кўра, Эрон кунлик нефть қазиб олиш ҳажмини осонлик билан 730 минг баррелгача ошириши мумкин. Июль ойи якунларига кўра, Эрон 2,87 миллион баррель нефть ишлаб чиқарди.
Агентлик прогнозига кўра, яқин истиқболда — Эронга нисбатан санкциялар бекор қилинганидан сўнг — ишлаб чиқариш ҳажми ойига 3,4—3,6 миллион баррелга етиши мумкин.
«2015 йил охирига қадар қазиб олиш ҳажми ўсиши кутилмаяпти, санкциялар бекор қилингунига қадар нефть омборларда сақлаб турилади, санкциялар бекор бўлганидан сўнг эса жаҳон бозорига ёпирилиб киради», — дейилади ХЕА ҳисоботида.
Эслатиб ўтамиз, Эрон нефть вазири нефть қазиб олиш ҳажмини кунига ярим миллион баррелга ошириш ҳақида кўрсатма берди.
Изоҳ (0)