Ўзбекистонда мамлакат Бош прокурорига давлат бошқаруви органлари ва ҳокимларнинг ҳужжатларини бекор қилишни таклиф этиш ҳуқуқини берувчи янги қонунчилик нормалари кучга кирди. Бу ҳақда «12news.uz» хабар бермоқда.
Ўзбекистон Президенти Ислом Каримов томонидан 10 август куни имзоланган «Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида»ги қонун билан «Прокуратура тўғрисида»ги қонунга тузатишлар киритилди.
Мазкур қонун Олий Мажлис Қонунчилик палатаси томонидан 2015 йил 29 июль куни қабул қилинган ва 2015 йил 6 август куни Сенат томонидан маъқулланган эди. Тузатишлар 11 августдан эътиборан кучга кирди.
Тузатишларга мувофиқ, Бош прокурор Ўзбекистон Президентининг қарорларини ижро этиш мақсадида ўтказилган текширувлар давомида давлат бошқаруви органлари ва ҳокимларнинг қонун ҳужжатлари нормаларига номувофиқ бўлган ҳужжатлари аниқланган тақдирда, бу ҳужжатларни тўхтатиб туриш ёки бекор қилиш тўғрисида Президентга таклифлар киритиши мумкин.
Бундан ташқари, давлат бошқаруви органлари ва ҳокимларнинг ҳужжатлари фуқароларнинг конституциявий ҳуқуқ ва эркинликларини жиддий равишда камситаётган бўлса, Бош прокурор бу ҳужжатларни тўхтатиб туриш ёхуд бекор қилиш тўғрисида Ўзбекистон Президентига таклифлар киритиши ҳам мумкин бўлади.
Изоҳ (0)