Чехия президенти Евроиттифоққа қарши бориб, Путин ва Ким Чен Ин билан Хитойдаги парадда қатнашади

Чехия президенти Милош Земан сентябрда Хитойда Иккинчи жаҳон уруши якунланганига бағишланган парадга ташриф буюрмоқчи, дея хабар бермоқда «Европейская Правда» Чехия ташқи ишлар вазирлигига таяниб. Аввалроқ эса ЕИ ушбу тадбирга биргаликда бойкот эълон қилишни таклиф этганди.

«Президентимиз Хитойдаги байрамга боришни исташини билардик. Биз ЕИнинг мувофиқлашган позициясини рад этишга мажбур бўлдик», — деди Чехия ТИВ матбуот котиби.

Земаннинг вакили сўзларига кўра, Чехия президенти ЕИнинг позициясини нотўғри деб ҳисоблайди.

Парадда қатнашмасликка асосий сабаб сифатида Хитой ва Япония ўртасидаги кескинликни кучайтиришдан қочиш келтирилмоқда.

Милош Земан парадда ягона европалик сиёсатчи бўлиши мумкин. У ерда, шунингдек, Россия президенти Владимир Путин ва Шимолий Корея етакчиси Ким Чен Ин бўлади. Чехия ОАВлари бундай қадамни «ЕИга хиёнат» деб атамоқда.