WikiLeaks МХА Япония бош вазири ортидан жосуслик қилгани ҳақида хабар берди

WikiLeaks порталида АҚШ Миллий хавфсизлик агентлиги (МХА) Японияда 35 нишонни кузатиб борганини тасдиқловчи маълумотлар пайдо бўлди, дея хабар бермоқда «Korrespondent.net».

Портал маълумотларига кўра, МХА Япония Вазирлар Маҳкамаси, Япония банки ходимлари ва бир қатор компанияларни, хусусан, Mitsubishi ва Mitsui конгломератларини кузатиб борган. Қайд этилишича, МХА кузатув асосида олинган ахборотни Австралия, Канада, Буюк Британия ва Янги Зеландия билан баҳам кўрган.

Кузатув ишлари камида 2006 йил сентябридан — Синдзо Абе Япония бош вазири этиб тайинланганидан бери давом этиб келган. Қайд этиш жоиз, Япония ҳукумати ҳозирча мазкур ахборотга ҳеч қандай муносабат билдиргани йўқ.

Аввалроқ WikiLeaks’да АҚШ Миллий хавфсизлик агентлиги Германия, Франция, Бразилиянинг юқори мартабали шахслари ортидан кузатув ўрнатганини тасдиқловчи маълумотлар эълон қилинган эди.