Қозоғистон аҳоли жон бошига ЯИМ ҳажми бўйича Россияни ортда қолдирди

2015 йилнинг биринчи ярим йиллиги якунларига кўра, Қозоғистон иқтисодиёти аҳоли жон бошига ялпи ички маҳсулоти (ЯИМ) ҳажми бўйича Россиядан ўзиб кетди. Бу ҳақда “Nur.kz” хабар бермоқда.

Прогнозларга кўра, 2015 йил якунлари бўйича Россияда аҳоли жон бошига ЯИМ ҳажми 11 минг 975 долларни, Қозоғистонда эса 12 минг 424 долларни ташкил этади, деб ёзади National Business.

ОПЕК прогнози бўйича, 2015 йилда Россия ЯИМи 2,8 фоизга қисқариб, 1,755 триллион долларни ташкил этади. Айни вақтда, «Росстат» йил охирига бориб мамлакат аҳолиси сони 146,6 миллион кишини ташкил этишини тахмин қилмоқда.

Ушбу ҳолатда ҳар бир россияликка ЯИМ ҳажми 706,5 минг рубль ёки 11 минг 975 долларни ташкил этади. Кўрсаткичнинг пасайишига нафақат ноқулай ташқи макроиқтисодий шароит, шу билан бирга Қрим ва Севастополь ҳисобига Россия аҳолиси сони 2,3 миллион кишига ортгани ҳам сабабдир.

Осиё Тараққиёт банки прогнозига кўра, Қозоғистон ЯИМи 2015 йилда 1,9 фоизга ўсиб, 216,3 миллиард долларни ташкил этади. Мамлакатда аҳоли сони йилига 1,5 фоизга ўсишда давом этса, 17,7 миллион нафар қозоғистонликнинг ҳар бирига ЯИМнинг 2,4 миллион тенгеси ёки 12 минг 424 доллар тўғри келади.