24 июль, жума куни Тошкентда учувчи-муҳандис, космонавт, Россия, Ўзбекистон ва Қирғизистон давлат мукофотлари соҳиби, авиация полковниги Солижон Шокирович Шарипов билан учрашув бўлиб ўтди, дея хабар бермоқда «Газета.uz». У БМТ Тараққиёт дастури кўмагида Café Scientifique лойиҳаси доирасида ўтказилди.
Anticafe О2’да йиғилганларга Солижон Шарипов етти кишилик оилада катта бўлгани, ўзи овқат пишириб, ўт ўргани ва сигир соғганини айтиб берди. Унинг космонавт бўлишига катта орзу ва Ўзген шаҳри кутубхонаси ёрдам берган. Бўлажак космонавт у ёки бу даражада авиация, космонавтика ва қизиқарли кишилар ҳаёти ҳақидаги барча техник адабиётларни ўқиб чиққан.
Мактабда ҳеч қандай муаммолар бўлмаган, уйга берилган вазифаларни у танаффус вақтида бажарган. Уйда эса дарс қилишга вақт бўлмаган, хўжалик ишларидан қўли тегмаган, фақат кечаларигина тонгга қадар китоб ўқиш мумкин бўлган. Отаси сарфланган электр энергияси учун уни койиган.
Шунингдек, Солижон Шарипов учрашув иштирокчилари саволларига жавоб берар экан, «Союз» космик кемаси ўз муқобиллари ичида энг ишончлиси эканлигини, уни учириш эса Американинг кемаларига қараганда қарийб 20 марта арзон тушишини таъкидлади.
Космонавт ракетада учиш чоғида пайдо бўладиган қўрқув, космосдаги ҳиссиётлар ҳақида ҳам сўзлаб берди.
Ўз нутқини Солижон Шарипов Феруз Воҳидовнинг қуйидаги сўзлари билан якунлади: «Ҳар бир киши ўз ишида профессор бўлиши керак». У ёшларга ўз мақсадларига эришишда барча имкониятларини ишга солишни ва смартфонларни камроқ «ковлаштириш»ни тилаб қолди.
Изоҳ (0)