Россия Миллий аксилтеррор қўмитаси Нальчик шаҳрида амалга оширилган террорчиларга қарши операциянинг баъзи тафсилотларини маълум қилди. Бу ҳақда «ТАСС» хабар бермоқда.
«Йўқ қилинган бандитларнинг шахсини уларнинг яқин қариндошлари иштирокида аниқлаш жараёнида улар орасида 1992 йилда туғилган Султан Абшаев ҳам борлиги маълум бўлди. У раҳбарлик қилган бандитлар гуруҳи аъзолари террорчилик ташкилотлари тармоғини ташкил этиш мақсадида маҳаллий ёшларни жангарилар сафига оғдириш фаолияти билан шуғулланган», — дейилади МАҚ хабарида.
Идора маълумотларига кўра, Абшаев 2015 йил июлида кичик ёшли ўғли кўз ўнгида ўлдирилган Кабардин-Болқор прокуратураси ходими ўлимига алоқадордир. Бундан ташқари, Абшаев 2014 йил ноябрида ўлдирилган йўл-патруль хизмати ходими қотиллик ишига ҳам алоқадорликда гумон қилинади.
«Яқин вақт ичида жиноятчилар бир қатор террорчилик ҳаракатларини амалга оширишни режалаштираётган эди, жумладан, Республика кунига бағишланган байрам тадбирлари вақтида ҳокимият органи вакилларини ўлдириш кўзда тутилган эди», — дейилади МАҚ хабарида.
Изоҳ (0)