Узоқ вақт телеэкранларда кўринмай қолган Карен Гафуржанов янги альбом яратди. Бу вақт оралиғида Карен Гафуржанов яна нима ишлар билан банд эканлиги кўпчилик мухлисларни қизиқтириши табиий. Шу сабабли «Дарё» нашри хонанда билан унинг ижодидаги янгиликлари ва келажак режалари ҳақида суҳбат қурди.
Нима учун охирги вақтларда телевидение ва медиа соҳасида кам кўриняпсиз?Сабаби янги клиплар олинмаётганди. Мухлисларни қизиқтира оладиган лойиҳанинг ўзи йўқ эди. Очиғи, янги альбом устида узоқ вақт ишладик ва у ҳозирда деярли тайёр ҳолга келди. Мустақиллик байрами арафасида мухлисларимни янги ва қайта ремикс қилиб куйланган қўшиқлар тўпламим билан хурсанд қилиш ниятидаман.
Лойиҳалардаги узоқ танаффус нимага тақалди: маблағгами ёки яхши шоирлар йўқми?Биласизми, ҳозир кимга қанақа? Масалан, кимдир шеър ва мусиқага эътибор қилмасдан клип олиб ташламоқда. Ҳозирги кунда бундай клиплар кўп. Яхши маҳсулотлар, ғоянинг ўзи йўқлиги менга халақит қилаётганди. Бироқ энди 1—2 та қўшиқни танлаб, уларга клип оламиз ва уни телевидениега берамиз.
Ёшингиз ўтгани сари савияга эътибор беряпсизми?Албатта, бу ёшда ишингизга ва ижодингизга бошқача назар билан қарашни бошлайсиз.
Узоқ вақт кўринмай қолишингиз рейтингингизга таъсир қилмайдими?Рейтингга таъсири бор. Бир вақтлар бизнинг рейтинг жуда баланд эди. Аммо ўша вақтда ўзимни қандай тутган бўлсам ҳозир ҳам ўшандайман.
Пасайишдан кейин яна аввалги даражага қайтишингиз мумкинми?Муҳими бу эмас, асосийси мухлислар қалбидан жой олиш.
Ижодингизда қандай янгиликлар бор ва альбомингиз қачон чиқади?Ҳозир 12 та янги қўшиқ ва 4 та ремикс ёздик. Бундан ташқари, янги гуруҳ билан ишлаяпман. Худо хоҳласа, шу йили кичикроқ залда яккахон концерт бермоқчиман. Яна тўйга ҳам тайёргарлик бор…
Янги альбомингизнинг қўшиқлари радиода берилдими?Ҳа, 1—2 таси берилди. Мухлислар яхши қабул қилди. Бу каби қўшиқлар ёмон бўлиши мумкин эмас. Мен илҳом келиб қолгандагина ёзаман.
Қайси шоирлар ва бастакорлар билан ишлайсиз?Мен Бобур Бобомурод билан кўп ишлардим. Яна ўзим ҳам шеър ёзиб тураман. Тўғри, шеърларни ва мусиқани профессионал шоир ва бастакорлар ёзиши керак, дейишади. Лекин мусиқа ҳақида гапирсак, мен ҳоҳлаган бастакор ишини кўрмадим. Биласизми, баъзида мухлисларга ёққан қўшиқни профессионал бастакор ёзмаган бўлиши ҳам мумкин.
Қўшиқ тайёр бўлганида уни хит бўлишига қанчалик ишонасиз?Баъзида ўзимга ёқмаган, кўнглим жиз этмаган ашула атрофдагиларга ёқиши мумкин. «Не ҳаёт» ашуламни ёзганимда унинг хит бўлишини аниқ билганман. Ундан олдин ёзган «Азизим» номли қўшиғимни хит бўлишини уйимдагилар айтган.
Ҳозирги ёшларни ижодини тинглайсизми?Ҳаракат қиламан. Чунки улар қаторида менинг ҳам шогирдларим бор. Мен Ботир Зокиров, Юлдуз Усмонова ва «Ялла» ансамблининг ретро қўшиқларини эшитаман. Ўзим билан чиққанлардан Dj Piligrim, Севарани айтишим мумкин.
Ижоддан ташқари нималар билан шуғулланасиз?Спортнинг оғир атлетика ва кроссфит тури билан шуғулланаман. Китоб ўқишга албатта вақт топаман.
Севги-муҳаббатдан бошқа мавзуда қўшиқ айтиб ҳам машҳур бўлиш мумкинми?Албатта, мисол учун Севара Назархоннинг «Улуғимсан, Ватаним» қўшиғини ҳозиргача маза қилиб эшитаман. Она тўғрисида, гул тўғрисида куйлаш мумкин. Мавзулар кўп.
Санъатда иқтидор биринчи ўриндами ёки маблағ?Ҳаракат. Маблағингиз ва истеъдодингиз бўлса бу 30 фоиз, қолган 70 фоизи эса ҳаракатдир. Ўзбекистонда ҳозир ҳар қандай шароит бор. 2—3 та мусиқий канал бор. Тўхтамай ҳаракат қилинса, муваффақиятга эришса бўлади.
Ижтимоий тармоқлардан фойдаланасизми? Улардан қандай фойда бор?Албатта, лекин мен фақат Facebook’дан фойдаланаман. «Одноклассники», Instagram ва Twitter’да йўқман. Ижтимоий тармоқлардан шоу-бизнес вакиллари кўпинча реклама мақсадида фойдаланмоқда.
Сизнинг www.karen.uz деб номланган сайтингиз бор экан. Нима учун ундаги янгиликлар 3 йилдан бери янгиланмаяпти?Ўзи аслида бу ишга маъмурлар қараши, журналистларни ишга олиши, хабарларни янгилаб туриши керак. Ҳозир янги маъмур қидиряпмиз. Тез орада сайтни ўзини ҳам замонга мослаб ўзгартирамиз. Унга янги клипларимизни жойлаштирамиз. Санъаткорлар учун сайт керак.
Кун тартибингиз қандай?Эрталаб тургач ишга бораман. Арт-менежер бўлиб ишлайман. Кундузги соат 3 да овоз ёзиш студиясига келаман. Соат 6 гача репетиция қиламиз. Кейин эса спортзалга бораман. Ҳафтанинг ҳар сешанба куни мени «Город» мажмуасидан топишингиз мумкин.
«Таманнози» кўрсатувида бошловчилик ҳам қилган эдингиз…Қилган эдим… Ҳозир эса қилмаяпман (кулиб). Ҳозиргача концертлар ва тўйларда бошловчилик қилиб тураман. Телевидениеда 2 та лойиҳада чиқдим, киноларга ҳам чақиришди.
Селфига муносабатингиз қандай?Биз тенги санъаткорлар суратларни олиб, Facebook ва «Одноклассники»ларга қўйиб ташламоқда (кулиб). Кимдир буни касаллик демоқда, лекин мен бу касалликка шукрки чалинмадим. Менда фотосессиялар кўп, журналистлар билан учрашувда яна суратга олишади. Шунинг учун ҳам селфига муҳтож эмасман.
Изоҳ (0)