«Ўзбекнаво» эстрада бирлашмаси июль ойида Лола, Анвар Собиров, Тамила ва Ягонанинг лицензиясини бекор қилди. Мухлисларда уйғонаётган «Айнан нима учун?» деган саволга бирлашманинг лицензия бўлими бошлиғи Одилжон Абдуқаҳҳоров изоҳ берди, деб хабар қилади «Sayyod.com».
«Лола охирги пайтларда миллий менталитетимизга ҳаддан ташқари тўғри келмайдиган кийимларни кийиши ва уни яна оммага кўрсатиши, ёшларга реклама қилиб худдики тарғиб қилаётгандек бўлмоқда. Ваҳоланки, бир неча маротаба бирлашма тарафидан огоҳлантирилганди. Шунга қарамасдан у қайта такрорлагани ва нафақат кийими, балки ижтимоий тармоқларда қўяётган суратларининг ёшларга шарм-ҳаё, ибо ва уят борасида салбий таъсири кузатилади ва буни унинг изоҳларидаги халқнинг эътирозларидан ҳам кўриш мумкин», — деди Одилжон Абдуқаҳҳоров.
«Хабарингиз бор, вилоятлар бўйлаб маънавият дарслари ўтилмоқда. Ёз бўйи санъаткорлар вилоятларга чиқиб, ушбу дарсларда қатнашиб, ёшлар билан учрашмоқда. Маънавият тарғиботи борасидаги дарсларга қатнашмаганлиги учун Анвар Собировга шундай чора кўрилди.
Тамила ҳам бир неча бора огоҳлантирилишига қарамасдан учта клипи шунақанги бемаза... У ҳам маънавият дарсларида кўринмади.
Ягона ҳам вилоятлардаги бир-икки учрашувларга чақирилганида баҳона қилиб бормади. Тошкентдаги мажлис бўлганида Рамазон вақтида ҳамманинг бўш пайти бўлган давр бўлса ҳам келмади.
Собиржон Мўминов эса техник хато билан жазоланганлар рўйхатига тушиб қолган. Шундай техник хато асосида эса огоҳлантирилганлар рўйхатидан Отабек Муталхўжаев тушиб қолган ва кейин у киритилди», — деб сўзини якунлади лицензия бўлими бошлиғи.
Изоҳ (0)