Ўзбекистон халқ ҳофизи Маъмуржон Узоқов хотирасига бағишланган Республика кўрик-танлови 2015 йилнинг 22 июль куни соат 10:00 да Фарғона вилояти Марғилон шаҳридаги Маъмуржон Узоқов номидаги маданият ва истироҳат боғида бўлиб ўтади. Бу ҳақда танлов ташкилотчиси Ўзбекистон Республикаси Маданият ва спорт ишлари вазирлиги Республика халқ ижодиёти ва маданий-маърифий ишлар илмий-методик маркази матбуот хизмати хабар бермоқда.
Тадбирдан кўзланган асосий мақсад 2015 йил «Кексаларни эъзозлаш йили» Давлат дастури ижросини таъминлаш, Ўзбекистон халқ ҳофизи Маъмуржон Узоқов яратган улкан ижодий услубни ёшлар орасида кенг тарғиб этиш, унинг бой маданий меросига эҳтиром кўрсатиш, устоз санъаткорнинг баланд пардаларда куйлаган «Сайдинг қўябер, сайёд», «Бу гулшан соз экан», «Мустаҳзод» «Шўхи паривашга», «Жонон бўламан деб», «Шайдо бўлибман», «Ёр истаб» каби катта ашула ва қўшиқларини ижро эта оладиган ёш истеъдод соҳибларини аниқлаш, уларни қўллаб-қувватлаш ва уларнинг катта саҳналарда ҳам ўз овоз имкониятларини намойиш этишларига ёрдам кўрсатишдан иборат.
Кўрик-танлов Ўзбекистон Республикаси Маданият ва спорт ишлари вазирлиги Республика халқ ижодиёти ва маданий-маърифий ишлар илмий-методик маркази, Ўзбекистон Миллий телерадиокомпанияси, Фарғона вилояти ҳокимияти ҳамда Маданият ва спорт ишлари бошқармаси Республика «Тасвирий ойна» ижодий уюшмаси билан ҳамкорликда ўтказилмоқда.
Республика танловида ҳудудий босқичларда ғолиб бўлган 25 нафардан ортиқ хонанда иштирок этади.
Изоҳ (0)