Франция ва Германиянинг собиқ етакчилари Николя Саркози ва Кристиан Вульф футбол бўйича 2022 йилги жаҳон чемпионати мезбонини аниқлаш бўйича овоз бериш жараёнига сиёсий босим ўтказиш йўли билан таъсир ўтказишга уринган. Бу ҳақда ФИФА президенти Йозеф Блаттер маълум қилди, дея хабар бермоқда «Ведомости».
«Саркози ва Вульф овоз бериш жараёнида иштирок этган ўз вакилларига таъсир ўтказишга уринган. Айнан шу сабабли ҳам биз Қатарда бўладиган чемпионатни қўлга киритдик. Бу қарорни қабул қилган одамлар жавобгарликни ҳам ўзларига олишлари керак. Агар ижроия қўмитасининг аксарият аъзолари ЖЧ-2022 Қатарда ўтишини хоҳласа, мен бу фикрга қўшилишга мажбурман», - деди Блаттер.
Эслатиб ўтамиз, Блаттер ФИФАнинг 29 май куни бўлиб ўтган конгрессида навбатдаги муддатга президент этиб сайланган эди, бироқ ташкилотда юз берган коррупция можароси сабаб, сайланганидан тўрт кун ўтиб истеъфога чиқишини эълон қилди.
20 июль куни Цюрихда ФИФА ижроқўмининг навбатдан ташқари мажлиси бўлиб ўтади ва унда ташкилотнинг бўлажак раҳбари сайлови санаси белгиланади. ФИФА президентининг навбатдан ташқари сайловига қадар Блаттер ташкилотга раҳбарлик қилиб туради.
Изоҳ (0)