Қозонда ўтказиладиган Мусулмон киноси фестивалида Ўзбекистон ҳам иштирок этади
Татаристон пойтахтида 2015 йил 5—11 сентябрь кунлари ўтказиладиган XI Қозон халқаро мусулмон киноси фестивалида иштирок этиш учун талабномалар қабул қилиш якунланди, деб хабар беради «Incity.az».
Фото: incity.azТашкилий қўмита 52 давлатдан 700 дан ортиқ фильмларни рўйхатга олди. Қозондаги кинофорумда Россиядан ташқари қуйидаги Европа давлатлари иштирок этади: Буюк Британия, Германия, Испания, Италия, Норвегия, Польша, Португалия, Сербия, Финландия, Франция, Болгария, Швеция, Хорватия ва Черногория. Америка материгидан эса Канада, АҚШ, Бразилия, Мексика ва Боливия, Осиёдан Афғонистон, Бангладеш, Баҳрайн, Ҳиндистон, Индонезия, Иордания, Ироқ, Эрон, Қатар, Хитой, Кувайт, Ливан, БАА, Покистон, Саудия Арабистони, Сурия ва Туркия ҳамда Африка мамлакатларидан Жазоир, Гвинея, Миср, Марокаш, Кабо-Верде ва Тунис иштирок этади.
Одатдагидек, МДҲ давлатлари — Озарбайжон, Қозоғистон, Қирғизистон, Беларусь, Украина ва Ўзбекистон кинофорумда фаол иштирок этади. Қисман тан олинган Фаластин ва Курдистон мамлакатларидан ҳам талабномалар тушган.
Саралаш комиссияси 3—4 ҳафта иш олиб боради. Шундан кейин XI Қозон кинофестивалининг танлов дастури эълон қилинади.
Қозон халқаро мусулмон киноси фестивали Татаристон пойтахтида 2005 йилдан бери ўтказиб келинади.
Изоҳ (0)