БМТнинг Женевадаги бўлимида 3 июль куни Марказий Осиёда савдо соҳасида минтақавий ҳамкорлик масалалари бўйича олий даражадаги семинар бўлиб ўтди. «Газета.uz» хабарига кўра, семинар БМТнинг Европа иқтисодий комиссияси (ЕИК) томонидан ташкил этилди.
БМТ радиосининг хабар беришича, учрашувда Озарбайжон, Афғонистон, Қозоғистон, Қирғизистон, Тожикистон, Туркманистон ва Ўзбекистон вакиллари иштирок этди.
Семинар иштирокчилари ҳар бир мамлакатнинг миллий савдони ривожлантириш бўйича дастури Барқарор ривожланиш мақсадларини жорий этишга, шунингдек, Денгизга чиқиш йўли бўлмаган мамлакатлар учун мўлжалланган Вена ҳаракатлар дастури ва Савдо жараёнларини соддалаштириш бўйича Жаҳон савдо ташкилоти битимини амалга оширишга қай даражада кўмак бериши муҳокама қилинди.
Семинар натижаларига асосан БМТ ЕИК ва бошқа манфаатдор халқаро ташкилотлар Марказий Осиёда савдо соҳасида минтақавий ҳамкорликни қўллаб-қувватлашга қаратилган ҳаракатлар бўйича аниқ таклифларни тайёрлайди.
Изоҳ (0)