Арманистонда электр энергияси нархи ошишига қарши намойиш ўтказаётганлар Ереван полиция бўлими бошлиғи ўринбосари Валерий Осипянга ҳуқуқ-тартибот органлари вакилларидан футбол жамоаси тузишни ва улар билан футбол ўйнашни таклиф қилди, деб хабар қилади «Newskaz.ru».
Осипян таклифни қабул қилди, аммо норозилик акцияси фаоллари билан футбол учрашуви «жамоат тартиби қайта тиклангани»дан сўнг ўтказилишини таъкидлаб ўтди.
«Полициячилар ҳозир ўз хизматини ўтамоқда ва футбол ўйнай олмайди», — деди полиция бошлиғи ўринбосари.
Намойишчилардан бири бунга жавобан бу ҳолатда акция иштирокчилари тўп олиб келишини, майдонга эса полициячилар пул тўлашини айтди.
Айни вақтда маршал Баграмян кўчасида осойишталик ҳукм сурмоқда. Акцияда фаол иштирок этмаётган кишилар намойишчилар ва полициячиларга сув, овқат, музқаймоқ келтиришмоқда.
Эслатиб ўтамиз, Ереванда электр нархи ошиши билан боғлиқ нотинчликлар 19-июнда бошланганди. 23-июнь куни полиция сув отувчи қурол ва кучдан фойдаланиб, намойишчиларни тарқатиб юборган. Бироқ бир кундан сўнг норозилик акцияси қайта тикланган.
Кейинроқ ОАВ Арманистон президенти намойишчиларга ён бергани ҳақида хабар берди. Аммо бу хабар ҳозирча расман тасдиқлангани йўқ.
Изоҳ (0)