Луизиана губернатори Бобби Жиндал 24 июнь куни АҚШ президентлиги учун 2016 йили бўлиб ўтадиган сайловларда иштирок этишини маълум қилди, деб хабар беради Reuters.
44 ёшли сиёсатчи Республикачилар партиясидан ўз номзодини қўяди.
Жиндал ҳиндистонлик иммигрантлар оиласида туғилган. Унга ҳиндча Пиюш исми қўйилган, аммо болалигидан бери The Brady Bunch телешоуси қаҳрамонларидан бирининг шарафига уни Бобби деб аташади. У келиб чиқиши жанубий Осиёдан бўлган АҚШнинг биринчи губернатори ҳисобланади.
16 июнь куни Республикачилар партиясидан мультимиллиардер Дональд Трамп ҳам президентликка ўз номзодини қўйишини маълум қилганди. Умумий ҳисобда бу партиядан 13 киши президентлик пойгасида иштирок этишини маълум қилиб улгурди. Жамоатчилик орасида ўтказилган сўровларга кўра, Флориданинг собиқ губернатори, АҚШнинг 43-президенти кичик Жорж Бушнинг укаси Жеб Буш биринчи ўринда бормоқда.
Мамлакат раҳбари лавозимига Демократлар партиясидан 4 киши даъвогарлик қилади, улар орасида собиқ биринчи хоним Ҳиллари Клинтон ҳам бор.
АҚШ президентлиги учун сайлов 2016 йил 8 ноябрда ўтказилади. Июль ойида Демократлар ва Республикачилар партияларидан биттадан номзод танлаб олинади. АҚШнинг амалдаги президенти Барак Обама конституцияга кўра, учинчи муддатга сайлана олмайди.
Изоҳ (0)