Ўзбекистон Республикаси Миллий хавфсизлик хизмати чегара қўшинларига қарашли Бухоро вилояти Қоракўл туманидаги ҳарбий қисмнинг чегара пости янги биноси фойдаланишга топширилди, деб хабар беради Ўза.
Шу муносабат билан ўтказилган тадбирда ҳарбий хизматчилар, давлат ва жамоат ташкилотлари вакиллари, уруш ва меҳнат фронти фахрийлари, ёшлар иштирок этди.
Соҳанинг моддий-техник базаси мустаҳкамланаётгани ҳарбий хизматчиларнинг масъулиятли ва шарафли вазифани муваффақиятли адо этишида муҳим омил бўлмоқда. Ўзбекистон Республикаси жануби-ғарбий чегараси ҳудудларидан бирида замонавий инфратузилмага эга янги чегара пости мажмуасининг фойдаланишга топширилгани бу йўналишдаги ишларнинг амалий самарасидир. Янги бинода чегарачиларнинг ўз жанговар тайёргарлиги, билим, кўникма ва малакасини ошириши, хизмат бурчини муваффақиятли ўташи учун барча шароит яратилган.
Тадбирда чегара пости қурилишида алоҳида ўрнак кўрсатган қурувчилар тақдирланди. Шунингдек, шартнома асосида хизмат қилувчи оилали ҳарбийларга хизмат уйларининг калитлари топширилди.
Таниқли санъаткорларнинг Ватан, тинчлик, дўстлик ва ёшликни тараннум этувчи куй-қўшиқлари тадбирга байрамона шукуҳ бағишлади.
Тадбирда Бухоро вилояти ҳокими М.Эсонов сўзга чиқди.
Изоҳ (0)